Tregu financiar – Dominojnë bankat, rritje e lartë e fondeve të pensionit
Fondet e pensioneve private ka qenë segmenti i tregut financiar me rritjen më të shpejtë gjatë vitit të kaluar. Sipas statistikave krahasuese të Bankës së Shqipërisë, vlera e aktiveve të këtyre fondeve vitin e kaluar u zgjerua me 42%.
Ndonëse fondet e pensioneve private kanë ende një peshë shumë të ulët kundrejt totalit të tregut financiar, me 0.1% të vlerës totale të aktiveve, kjo formë investimi po tërheq interes në rritje nga individët.
Edhe falë një promovimi më aktiv nga fondet dhe institucionet financiare të lidhura me to, një numër gjithnjë e më i lartë individësh janë ndërgjegjësuar për avantazhet e investimit në një pension shtesë në të ardhmen.
Investimi në një fond pension mundëson edhe incentiva të kufizuar fiskalë, falë një përjashtimi nga tatimi mbi të ardhurat personale deri në një vlerë prej 200 mijë lekësh në vit.
Rritje me ritme relativisht të larta vitin e kaluar ka regjistruar edhe tregu i sigurimeve, me një zgjerim të totali të aktiveve prej 15%, e mbështetur kryesisht nga rritja e lartë e të ardhurave nga primet e sigurimit.
Rritje me afro 15% ka shënuar edhe tregu institucioneve financiare jobankare, ku pjesën kryesore e zënë institucionet e mikrokredisë.
Sistemi bankar regjistroi rritje pozitive edhe gjatë vitit të kaluar. Totali i aktiveve u rrit me afro 7% krahasuar me një vit më parë dhe vazhdon të dominojë sistemin financiar, me mbi 90% të aseteve totale.
Një rritje në përmasa modeste regjistroi edhe aktiviteti i shoqërive të kursim kreditit. Totali i aktiveve të këtyre shoqërive u zgjeruar me 2.4% gjatë vitit.
Ndërkohë, i vetmi segment i tregut financiar në rënie për vitin e kaluar ishte ai i fondeve të investimit, që u tkurr me 2.3% gjatë vitit.
Ersuin Shehu/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.