Tregu i automjeteve – Shitjet në Kinë bien me 14%
Shitjet e makinave në Kinë ranë me 13.8 për qind në shkurt krahasuar me një vit më parë.
Gjatë ditës së sotme,shoqata më e madhe e industrisë së automobilave në Kinë, tha se shifrat shënuan muajin e tetë të njëpasnjëshëm të rënies në tregun më të madh të automjeteve në botë. Shoqata e Prodhuesve të Automjeteve të Kinës (CAAM) tha se shitjet u ulën në 1.48 milionë makina muajin e kaluar, pas rënies prej 16 për qind në janar dhe 13 për qind në dhjetor. Shitjet e automjeteve të reja të energjisë, si makinat elektrike, u rritën 53.6 për qind nga viti në vit.
“Tendenca e vitit të kaluar ka vazhduar edhe në këtë vit, dhe gjendja ekonomike ka qenë gjithashtu e dobët. Kjo ka ulur konsumin” -tha zëvendës sekretari i përgjithshëm i CAAM Shi Jianhua për gazetarët në një konferencë për shtyp në Pekin.
“Konsumatorët gjithashtu po presin për më shumë politika qeveritare” -tha ai. Kina planifikon miliarda dollarë në uljen e taksave dhe shpenzimet e infrastrukturës për të mbështetur një ekonomi që rritet me ritmin më të ngadalshëm në pothuajse 30 vite për shkak të kërkesës së brendshme dhe një lufte tregtare me Shtetet e Bashkuara. Vendi ka premtuar subvencione për të rritur shitjet rurale të disa automjeteve, si dhe kërkesën për automjete të reja të energjisë, pasi tregu i automjeteve të Kinës u kontraktua vitin e kaluar për herë të parë në më shumë se dy dekada.
“Detyra kryesore për tregtarët në gjysmën e parë të vitit 2019 është zvogëlimi i inventarëve të automjeteve mes rritjes së presioneve financiare” -tha Chen Shihua, ndihmës sekretar i përgjithshëm i CAAM.
Performanca e shitjeve për disa prodhues të automjeteve kineze ka qenë e përzierë deri më tani. Great Wall Motor njoftoi rritje 18 për qind në shkurt krahasuar me të njëjtin muaj të vitit të kaluar, ndërsa Geely Automobile Holdings tha se shitjet ranë 24 për qind në të njëjtën periudhë.
Burimi:Reuters
E.T/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.