Tregu i gazit potencial për vendin – Investimet deri në 2030 do të shkojnë në vlerën e 347 milionë euro
Shpenzimet e investimeve të sektorit të gazit natyror për periudhën 2018–2030, në Shqipëri do të jenë në vlerën e 347 milionë euro. Kjo vlerë financiare do të përdoret për interkonjeksionin, transmetimin dhe shpërndarjen në skenarin e promovimit të gazit natyror.
Shqipëria është një nga vendet e tranzitit për Gazsjellësin Trans Adriatik, i cili do të transportojë gazin azer nga Greqia, nëpërmjet Shqipërisë, deri në Itali.
Deri në fund të vitit 2020, gazsjellësi duhet t’i japë Shqipërisë mundësinë e përdorimit të gazit natyror për përdorim në të gjithë sektorët e ekonomisë. Gazsjellësi TAP do të jetë funksional në pak vite, çka e bën thelbësore fuqizimin e potencialit të eksplorimit dhe prodhimit të naftës dhe gazit në Shqipëri dhe në det të hapur, hartimin e një plani strategjik të integruar për të gjithë nënsektorin ekonomik të naftës dhe gazit.
Në këto kushte natyrshëm në një strategji kombëtare për sektorin e naftës dhe gazit përfshin:
- Krijimin e një standardi bazë që përcakton në mënyrë të përshtatshme vendin aktual të Shqipërisë në zhvillimin e sektorit të naftës dhe gazit në rajon;
- Përcaktimin e një sërë objektivash zhvillimi që duhet të arrihen kundrejt vitit 2030; 3. Krijimin e planeve të detajuara për zbatimin e secilit komponent të planit strategjik.
Aktualisht Shqipëria ka një sistem të vogël të izoluar të shpërndarjes së gazit, i cili nuk është i lidhur me sistemet ndërkombëtare të transmetimit të gazit. Madhësia aktuale e tregut të gazit në Shqipëri mbetet një nga më të voglat në rajonin e Ballkanit Perëndimor 15 milionë m3N (prodhimi dhe konsumi në vitin 2015).
Megjithatë, gjatë dy dekadave të ardhshme llogaritet se konsumi i përgjithshëm i gazit potencial në vend mund të arrijë në 1,15 miliardë m3N deri në vitin 2040.
Ndërsa integrimi i tregut të gazit do të sigurojë shpërndarjen e gazit në tregun vendor dhe do të forcojë ekonominë kombëtare.
Sistemi i transmetimit dhe shpërndarjes së gazit që do t’i mundësonte vendit të përmbushte 77% të kërkesës potenciale kombëtare në vitin 2020, duke u rritur në 82% të kërkesës potenciale të konsumit të gazit deri në vitin 2040. Sistemi i transmetimit i propozuar i gazit dhe rrjetit shpërndarës mbulon përkatësisht 12% të sipërfaqes totale të vendit dhe 65% të popullsisë.
Entela Barjamaj/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.