Tregu i përpunimit të drurit – Shqipëria eksporton me miliona euro çdo vit
Çdo vit numri i të punësuarve në industrinë e përpunimit të drurit rritet me 10 për qind. Në këtë industri japin kontributin e tyre mbi dy mijë biznese të regjistruara e që kanë një numër të punësuarish mbi 60 mijë. Por pavarësisht numrit të të punësuarve aktualë kjo industri ka nevojë për forcë punëtore të kualifikuar. Në një intervistë për televizionin SCAN, Tonin Aliaj përfaqësues i kësaj industrie u shpreh se qeveria duhet të ndërhyjë duke kualifikuar krahun e punës pasi vetë biznesi nuk mund ta bëjë për shkak të kostove të larta.
Pjesa më e madhe e kompanive të kësaj industrie eksportojnë produktet e tyre në tregun europian. Vlera e eksporteve është mbi 100 milionë euro në vit.
Kualifikimi i krahut të punës është një nga disavantazhet që ka vendi ynë, por pavarësisht tregu i kësaj industrie ka interes edhe për të huajt pasi kostot e punëtorëve janë nga më të lirat në rajon dhe Evropë. Nëse në një vend tjetër një ditë pune e një punëtori shkon deri në 100 euro në vendin tonë kosto e tij është 20 euro.
Entela Barjamaj/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.