Tregu i sigurimeve – Kompanitë: Më pak mjete të pasiguruara
Forcimi i kontrollit ka ulur disi numrin e mjeteve të pasiguruara. Drejtori i përgjithshëm i Atlantik, Dritan Çelaj, thotë në një intervistë për TV Scan se ulja e numrit të mjeteve të pasiguruara po ndihmon në rritjen e primeve nga sigurimet e detyrueshme motorrike. Për tremujorin e parë të vitit, tregu i sigurimeve të jo-jetës u rrit me rreth 3.5% krahasuar me të njëjtën periudhë të një viti më parë.
Zoti Çelaj thotë se sigurimet e mirëfillta vullnetare ende ngelen në përmasa shumë modeste. Sipas tij, rritja e këtij segmenti të tregut mund të vijë gradualisht dhe do të varet nga përmirësimi i kulturës së sigurimeve në shoqëri.
Kompanitë e sigurimeve presin që ligji i ri për sigurimet e detyrueshme në sektorin e transportit të adresojë disa nga problemet me të cilat po përballet tregu. Ligji në fjalë gjithashtu do t’i hapë më në fund rrugë aplikimit të sistemit bonus-malus në vendosjen e primeve të sigurimit të detyrueshëm të mjeteve.
Drejtori i ekzekutiv i Autoritetit të Mbikëqyrjes Financiare, Ervin Koçi, tha se ky institucion ka paraqitur pranë Ministrisë së Financave projektligjin e ri për sigurimin e detyrueshëm në sektorin e transportit, që pritet të adresojë problematikat e segmentit më të rëndësishëm të tregut të sigurimeve.
Drejtori ekzekutiv i AMF theksoi se tregu i sigurimeve ngelet i vogël dhe i varur nga produktet e detyrueshme, qoftë në mënyrë të drejtpërdrejtë apo të tërthortë.
Vitin e kaluar, AMF ka adresuar në disa vendime problemet e fondit të kompensimit dhe zoti Koçi tha se nuk do të lejohet krijimi akumulimi i detyrimeve të reja.
Kryetari i Bordit Drejtues të AMF, Pajtim Melani tha se aktiviteti mbikëqyrës vitin e kaluar është forcuar dhe përmendi një sërë masash të marra kundër kompanive të sigurimeve.
Ersuin Shehu/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.