Tregu i sigurimeve – Kompanitë paguajnë më pak dëme

Kompanitë e sigurimeve këtë vit po paguajnë më pak dëme. Sipas të dhënave nga Autoriteti i Mbikëqyrjes Financiare, për katër muajt e parë të vitit dëmet e paguara nga kompanitë e sigurimeve ranë me 18% krahasuar me të njëjtën periudhë të një viti më parë.

Rënia e dëmeve të paguara lidhet sidomos me kartonin jeshil, ku dëmet kanë rënë me afro 60% dhe me sigurimin e shëndetit, me afro 40%. Dëmet e paguara kanë rënë ndjeshëm edhe në tregun e sigurimit të jetës, me rreth 30% më pak.

Raporti mes dëmeve dhe primeve në tregun shqiptar të sigurimeve është rreth 32%, ndër nivelet më të ulët në Europë.

Këtë vit siguruesit po kursejnë me dëmet, por ndërkohë që ecuria e tregut për sa i takon primeve të arkëtuara është e dobët. Për katër muajt e parë të vitit, primet e shkruara bruto u rritën me 23.3% krahasuar me katërmujorin e parë 2017.

Tregu i sigurimit të jetës është në rënie, ndërsa i segmenti i jo-jetës ka regjistruar një rritje modeste me 4%. Tregu ka vazhduar të mbështetet në masën dërrmuese te sigurimet e detyrueshme.

Në segmentin e jo-jetës, pesha e sigurimeve të detyrueshme motorrike është sa 65% të totalit, çka dëshmon se industria e sigurimeve ngelet e varur kryesisht nga këto produkte.

Nuk bën shumë përjashtim as sigurimi i jetës, ku 53% e primeve arkëtohen nga sigurimi i jetës së kredimarrësve, produkt ky që është i detyrueshëm si kërkesë e bankave.

Ersuin Shehu/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.