Tregu informal i dhomave në Airbnb në Shqipëri, operatorët thirrje: “Konkurencë e padrejtë për hotelet”
Kompania e famshme që ofron mundësi akomodimi në apartamente dhe banesa individësh për turistët nga e gjithë bota “Airbnb” ka postuar listën e kryeqyteteve në Europë ku renditen çmimet më të shtrenjta të dhomave për një natë.
Vendin e parë në renditje e mbajnë Monaco dhe Londra, ku një shtëpi për një natë mund të kapë shifrën e 349 dhe 222 eurove.
Ndërkohë në këtë renditje ndodhej edhe kryeqyteti i Shqipërisë, Tirana e cila me çmimet e saj renditej mbi Zagrebin dhe Beogradin fqinj në kuotën e 57 eurove.
Rreth këtyre statistikave ka reaguar Shoqata Shqiptare e Turoperatorëve & Agjencive Turistike. Sipas organizatës kjo pjesë e tregut në Shqipëri që funksionon nëpërmjet Airbnb është informale, nuk paguan taksa dhe konkuron në mënyrë të padrejtë hotelet:
“Lajm i mirë është që më në fund po fillojmë të dalim në statistika reale ku mund të krahasohemi me botën në turizëm. Lajmi i keq është që i gjithë tregu i Airbnb në Shqipëri është jashtë sistemit dhe nuk paguan asnjë taksës, duke konkuruar në mënyrë të padrejtë me hotelet, ndërkohe që shet më shtrenjtë se vet hotelet në Shqipëri!” – shprehet shoqata nëpërmjet një postimi në Facebook.
Gjithashtu Shoqata bën thirrje për shtrenjtësinë e çmimeve të apartamenteve, në krahasim me çmimet e hoteleve që janë më të lira në rajon dhe kjo shkaktohet pikërisht nga tregu i parregulluar sipas tyre:
“Dhe çuditërisht një apartament ne Tirane kushton sa një apartament në Zagreb, dhe kushton më shtrenjtë sesa në Beograd, Ankara, Shkup, apo Podgoricë. Por në konkurrencën me hotelet e këtyre vendeve, hotelet në Tiranë apo Shqipëri janë në fund të listës përsa i përket çmimeve. Dhe një nga arsyet është patjetër edhe kjo konkurencë e pandershme me tregun e shtëpive në Airbnb, shqetësim që i është paraqitur qeverisë në disa takime nga ATOA, por deri tani nuk kemi asnjë zgjidhje.”
Lajm i mirë është që më në fund po fillojmë të dalim në statistika reale ku mund të krahasohemi me botën në turizëm….
Posted by Shoqata Shqiptare e Turoperatorëve & Agjencive Turistike on Monday, February 17, 2020
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.