Tregu shqiptar, më shumë automjete hibride se sa elektrike – Azia juglindore dominon në shitje
Automjetet elektrike mund të jenë e ardhmja, por aktualisht shitjet e tyre janë të kufizuara nga një numër faktorësh, si numri i pikave të karikimit. Pritet që deri në vitin 2025 makinat me bateri të zënë 15% të shitjeve, por aktualisht kjo shifër Europën Lindore e Qendrore është pranë zeros.
Kjo vlen edhe për Shqipërinë, ku vitin e kaluar janë importuar një numër i limituar automjetesh me bateri elektrike. Sipas të dhënave të përpunuara nga SCAN, vlera e këtij tregu në 2017 ishte vetëm 294 mijë euro.
Importet për këto lloje automjetesh bëhen kryesisht nga Bashkimi Europian, ku nga Gjermania u importuan 59 mijë euro automjete, ndjekur nga Sllovakia me 57 mijë euro dhe Italia me 31 mijë euro.
Megjithatë, ndarë sipas shteteve, është Japonia vendi kryesor i origjinës për automjetet elektrike që qarkullojnë në vend, fale modeleve si Nissan Leaf apo Mitsubishi. Një fetë të konsiderueshme të tregut zë edhe SHBA, atdhe i prodhuesit Tesla, me 50 mijë euro shitje.
Ndërkohë, gjatë muajve të parë të këtij viti janë importuar vetëm rreth 60 mijë euro automjete elektrike, nga ku 57 mijë euro janë me origjinë nga Sllovakia, i cili është shteti që prodhon më shumë automjete për frymë në Europë. Modelet kryesore që importohen nga ky shtet janë ato të Volksëagen.
Hibridet të preferuara
Ndërkohë, tregu shqiptar ka një kërkesë shumë më të lartë për automjetet hibride, pra që kanë si një motor me naftë apo benzinë, edhe një motor elektrik me bateri. Për vitin 2017 vlera e importeve arriti në 571 mijë euro, ndërsa për periudhën Janar-Prill 2018 janë 228 mijë euro automjete hibride të importuara.
Arsyeja kryesore për këtë fenomen është fakti se në Shqipëri ende mungon infrastruktura që mbështet automjetet tërësisht elektrike, si pikat e karikimit të shpejtë të shtrirë në rrjetin rrugor. Një raport i fundit të vitit 2017 na rendit në vendin e fundit në Europë për pajisjen me pika karikimi, vetëm dy të tilla.
Azia juglindore zë 97% të shitjeve për vitin e kaluar dhe 100% të shitjeve për katërmujorin e parë të këtij viti. Korea e Jugut është vendi kryesor i origjinës me 475 mijë euro në vlerë importesh, ndjekur nga Japonia me 96 mijë euro. Pas tyre ndjekin importet nga Gjermania me një vlerë totale prej 18 mijë eurosh. Korea dhe Japonia janë edhe liderët botërorë në shitjen e automjeteve hibride, falë modeleve të ndryshme të Toyota, Honda dhe Hyundai.
Perspektiva
Pavarësisht vlerave mjaft të ulëta të importeve dhe depërtimit të dobët në tregun vendas, pritet që shitjet e automjeteve elektrike apo hibride të shumëfishohen në vijim. Ndikim do të kenë sigurisht edhe politikat nxitëse që do të merren nga pushteti qendror dhe lokal, si nisma e Bashkisë së Tiranës për konvertimin e flotës së autobusëve urbanë në tërësisht elektrikë, apo nismat e institucioneve për të blerë automjete elektrike. Sa i takon raportit mes elektrikeve dhe hibrideve, krijimi i një rrjeti të qëndrueshëm me pika karikimi duket ende larg, por projekte si ai i kompanisë bullgare Eldrive për pajisjen e akseve rrugore kryesore në Ballkan me stacione karikimi do të rrisë patjetër leverdinë e të paturit një makinë elektrike në Shqipëri.
A.H./SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.