Tregu i sigurimeve – Në rënie për gjysmën e dytë të vitit
Tregu i sigurimeve paraqitet në rënie në muajt e fundit të këtij viti. Sipas të dhënave nga Autoriteti i Mbikëqyrjes Financiare, në fund të 11-mujorit, rritja e primeve të shkruara bruto zbriti në më pak 7%, nga 9% që kishte qenë për 10-mujorin.
Ritmet e rritjes kanë ardhur gradualisht në rënie gjatë vitit, po të kemi parasysh se në fund të gjashtëmujorit rritja kishte qenë 12%. Kjo tregon se në muajt e fundit të ardhurat e kompanive nga primet janë më të ulëta krahasuar me të njëjtën periudhë të vitit të kaluar.
Asnjë nga produktet kryesore të sigurimit nuk po shënon rritje dyshifrore. Grupi me peshën kryesore në të ardhura, që përfshin sigurimet motorike për përgjegjësitë ndaj palëve të treta, për 11-mujorin u rrit me rreth 7%.
Ndërsa produkti më i rëndësishëm mes sigurimeve vullnetare, sigurimi ndaj zjarrit dhe forcave të natyrës për 11 muajt e këtij viti u rrit me më pak se 4%.
Edhe një nga produktet më të suksesshme në vitet e fundit, sigurimi i shëndetit, këtë vit po rezulton në rënie, me afro 13% më pak prime krahasuar me një vit më parë.
Shifrat e tregut të sigurimeve janë në rënie edhe për sa i përket dëmeve. Për tremujorin e parë të vitit dëmet në sigurime ishin rritur me 83%, për gjashtëmujorin rritja e tyre zbriti në 44%, ndërsa në fund të 11-mujorit dëmet rezultoni në rritje me më pak se 16%.
Raporti mes dëmeve dhe primeve është rikthyer në kufijtë e 30%, duke e mbajtur Shqipërinë ndër vendet me raportin më të ulët në Europë për këtë tregues.
Ersuin Shehu/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.