Treguesi i ndjesisë ekonomike – Shënon nivelin më të lartë në Eurozonë që prej flluskës dot-com
Treguesi i ndjesisë ekonomike në Eurozonë është rritur bindshëm për Tetorin, duke arritur në nivelet më të larta që prej vitit 2000, kur shpërtheu e ashtuquajtura flluska dot-com, ku rritja e përdorimit të internetit solli spekulime dhe dështimin e shumë kompanive.
Niveli më i lartë në 17 vite i treguesit, të publikuar nga Komisioni Europian, konfirmon rimëkëmbjen ekonomike të Eurozonës.
Treguesi mbi ndjesinë ekonomike, i përbërë nga sondazhe mujore të komisionit, u rrit në 114 pikë në Tetor, nga 113.1 që ishte gjatë Shtatorit.
Ky nivel ishte më i larti që prej Tetorit 17 vite më parë, ku flluska dot-com filloi të përmbysë besimin në Eurozonë. Indeksi i përgjithshëm i klimës së biznesit, që tregon fazën e ciklit të biznesit, u rrit gjithashtu në 1.44 në Tetor nga 1.34 që ishte gjatë Shtatorit.
Optimizmi është rritur në të gjithë sektorët ekonomik të anketuar, përfshirë shërbimet, që është sektori më i madh i rajonit.
Besimi në Industri dhe shitjet me pakicë është rritur gjithashtu. Përmirësimi i ndjesisë në Eurozonë nuk pati përhapje në Britani, ku besimi i konsumatorëve ka patur rënie.
KLevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.