Treguesit e kriminalitetit në Lezhë problematikë – Xhafaj: Viti 2017 jo pozitiv në këtë aspekt

Pas analizës vjetore të Drejtorisë Vendore të Policisë në Lezhë, Ministri Xhafaj në një komunikim për mediat tha se ka konstatuar disa ndryshime pozitive në punën e policisë se qarkut të Lezhës por ende vazhdojnë të jenë problematikë treguesit e kriminalitetit.

“Konstatoj që ka disa arritje, ka disa suksese në punën e policisë, disa ndryshime pozitive në punën e policisë të qarkut të Lezhës. Por nga ana tjetër shoh me shqetësim që ka edhe disa probleme në aspektin e treguesve ë kriminalitetit. Viti 2017 nuk ka qenë një vit fort pozitiv për Lezhën nga ky aspekt, ashtu siç mund të konstatoj tregues pozitivë për sa i përket luftës kundër kanabisit, menaxhimit të sezonit të veror, luftës për evidentimin dhe goditjen e disa grupeve kriminale dhe aseteve të tyre, mund të them që ende ka vend për të përmirësuar treguesit e kriminalitetit”, tha ai.

Ai gjithashtu ka theksuar tre prioritete të rëndësishme, së pari çështjen e integritetit të punonjësve të Policisë së Shtetit, luftën krimit të organizuar, si dhe një riorganizim të ri policor që synon një kontroll më të mirë të territorit dhe një marrëdhënie të re të policisë me qytetarët.

V.H/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.