Treguesit e OSHEE – Janar-maj, humbjet u ulën në 28.7%, rriten arkëtimet

Pas pesë muajsh me mungesë të dhënash Operatori i Shpërndarjes së Energjisë Elektrike ka publikuar rezultatet për ecurinë e treguesve të kompanisë. Të dhënat gjithsesi tregojnë për një situatë pozitive.

Sasia e shitur e energjisë është rritur me 3 për qind, çka tregon për rritje të konsumit krahasuar me të njëjtën periudhë të një viti më parë. Arkëtimet nga ana tjetër kanë arritur në 27.5 miliardë lekë ose 4.6 për qind më shumë.

Edhe niveli i humbjeve ka zbritur në 28.7 për qind ose 1.01% më pak se e njëjta periudhë e një viti më parë. OSHEE bën me dije se ka pasur edhe një ulje të ankesave që konsumatorët kanë bërë pranë sporteleve të kompanisë të cilat rezultojnë 44% më të ulëta krahasuar me janar 2017 dhe 11.3% më të ulëta krahasuar me mars 2017. Ankesa ka pasur vetëm për 0.61% të faturave të lëshuara.

Një tjetër aspekt i rëndësishëm i treguesve të kompanisë është ai i borxhit të keq që ka hyrë në një cikël pagesash sipas aktmarrëveshjeve të nënshkruara mes konsumatorëve dhe kompanisë. Sipas të dhënave borxhi i keq principal, për fatura  të viteve 2007-2014 është 50.1 miliard lekë në fund të 5-Mujorit 2017 nga 67.8 miliard lekë në fund të vitit 2014.

Nertila Maho/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.