Treni Tiranë – Durrës – Rinas / Zv.ministri: Punimet nisin në korrik, do të merren masa për akordimin e TVSH-së
Punimet për rehabilitimet e linjës hekurudhore Tiranë-Durrës dhe ndërtimin e linjës s re drejt Rinasit parashikohet të nisin brenda muajit korrik.
Zv.ministri i Infrastrukturës dhe Energjisë, Artan Shkreli thotë për TV SCAN se aktualisht po vlerësohen ofertat teknike dhe ato ekonomike të 6 kompanive ndërkombëtare që janë në garë për këtë vepër infarstrukturore.
Kosto totale këtij projekti kap vlerën e 90 mln eurove, nga të cilat 36 mln euro janë hua e BERZH dhe 35.4 mln euro grant I Bashkimit Evropian. Ndërkohë që, qeveria shqiptare duhet të financojë vlerën TVSH-së, që arrin në 16 mln euro.
Megjithatë, në buxhetin e vitit 2020 kjo vlerë nuk u akordua, por sipas Shkrelit me rishikimin e buxhetit kjo shumë do të jetë në dispozicion të projektit.
Zv.ministri thotë se çmimi i biletës do të përcaktohet pas nisjes së operimit të veprës, që mund të jetë nga shteti apo nga privati, por qeveria do të synojë që ajo të jetë në vlerën 1.5 euro.
Zbatimi i këtij projekti është zvarritur prej vitesh, teksa më herët zyrtarë të ministrisë kanë deklaruar se deri në fund të 2018-ës do të duhej të ishte nënshkruar kontrata, teksa fundi I vitit 2020 duhet të shënonte përmbylljen e punimeve.
Ola Mitre/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.