Trump e ka ndarë mendjen – Tarifa shtesë për $200 mld produkte importi nga Kina
Presidenti amerikan, Donald Trump duket se e ka vendosur se do të aplikojë tarifa shtesë edhe për 200 miliardë dollarë produkte nga Kina, pavarësisht se Sekretari Amerikan i Shtetit, Steven Mnuchin po përpiqet të rinisë negociatat me Kinën. Të paktën këtë raportojnë mediat amerikane duke i`u referuar burimeve pranë palëve.
Koha e saktë e aplikimit të këtyre tarifave shtesë ende nuk dihet. Përpjekjet e vazhdueshme nga brenda Shteteve të Bashkuara, madje edhe nga kompanitë më të mëdha në vend, si Apple, duket se kanë qenë të kota, pasi Donald Trump e ka ndarë mendjen. Drita jeshile për tarifat, fillimisht e raportuar nga Bloomberg, gjeneroi një rënie të ndjeshme të aksioneve në Shtetet e Bashkuara të Amerikës, por edhe të Yuanit kinez.
Dollari ndërkohë fitoi terren kundrejt shportës së valutave kryesore. Administrata amerikane i ka kërkuar Kinës që të shkurtojë suficitin tregtar që ka me Shtetet e Bashkuara, prej 375 miliardë dollarësh, pasi sipas Donald Trump kjo është e pandershme. Shtëpia e Bardhë është e vendosur të adresojë praktikat tregtare të Kinës.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.