Trump e pranon “skandalin”: Është e drejta ime absolute të ndaj informacione me Rusinë

Presidenti amerikan Donald Trump ka mbrojtur vendimin për të ndarë informacione tepër sekrete me zyrtarët rusë.

Nëpërmjet një postimi në Twitter, ai e cilëson si të drejtën e tij absolute, për të ndarë të dhëna me Rusinë, ndërkohë që dy zyrtarë të lartë të administratës së tij, këshilltari i Sigurisë Kombëtare, Herbert Raymond McMaster, dhe Sekretari i Shteti, Rex Tillerson, u përpoqën t’i hidhnin poshtë raportet e mediave amerikane.

Të Hënën në mbrëmje, Washington Post raportoi se, kreu i Shtëpisë së Bardhë u ka përcjellë informacione tepër sekrete zyrtarëve ruse, duke përfshirë edhe ministrin e jashtëm, Sergei Lavrov, gjatë një bisede në Zyrën Ovale. “Si president doja të ndaja me Rusinë, dhe kam të drejtën absolute ta bëj një gjë të tillë, fakte të lidhura me terrorizmin dhe sigurinë e fluturimeve ajrore. Janë disa arsye humanitare, plus kësaj, dua që Rusia ta përshkallëzojë luftën kundër ISIS dhe terrorizmit”, thuhet në mesazhin e Trump në Twitter.

Kjo ngjarje ka lënë në hije prioritetet legjislative të republikanëve, si kujdesi shëndetësor dhe reforma e taksave, dhe ka nxjerrë në pah një ndarje të madhe mes Shtëpisë së Bardhë dhe agjencive të inteligjencës në SHBA, që, në muajin janar, arritën në përfundimin se, Rusia ishte përpjekur të manipulonte zgjedhjet amerikane, në favor të Trump.

Lidion Kulla/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.