Trump humbet durimin më Kinën – Kërcënon rritjen e tarifave ditën e Premte. Përmbysen bursat
Presidenti i Shteteve të Bashkuara, Donald Trump, rriti presionet ndaj Kinës për të arritur një marrëveshje tregtare, duke thënë se do të rrisë ndjeshëm tarifat ndaj mallrave kinezë. Trump kishte vonuar më herët gjatë vitit rritjen e tarifave, duke theksuar bisedimet produktive me Kinën.
Megjithatë, lajmërimi i fundit i presidentit amerikan ngriti dyshime mbi arritjen e një marrëveshjeje tregtare mes 2 ekonomive më të mëdha në botë. Trump shkroi në Tëitter se tarifat do të rriten në 25% këtë të Premte dhe do të shtohet lista e produkteve kineze që do jenë subjekt i barrierave. “Marrëveshja tregtare me Kinën po vazhdon, por në mënyrë shumë të ngadaltë, pasi po përpiqen të rinegociojnë”, shkroi Trump.
Bisedimet pritet të vazhdojnë këtë javë, ndërkohë që zv/Presidenti kinez, Liu He, do të udhëtojë në Washington. Gjatë takimit të Sekretarit të Thesarit Steven Mnuchin në Pekin gjatë muajit Prill, bisedimet kishin qenë produktive. Vetë presidenti kishte thënë së fundmi se bisedimet po shkojnë mirë. Burimet e industrisë bënë të ditur se mendonin që lufta tregtare po mbaron.
Administrata e Trump ka këmbëngulur për themelimin e një mekanizmi që siguron që Kina të ndjekë premtimet për të blerë më shumë mallra amerikan. Këto kërcënime të reja shkaktuan trazira në bursat botërore. Indeksi i Shangait ra me 6.6%, ndërsa indeksi S&P 500, pritet të hapet në rënie me 2.2% ditën e Hënë në mbrëmje. Yuani kinez ra gjithashtu ndaj dollarit amerikan, duke prekur 6.75.
Klevis Llaha / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.