Trump: “Impeachment” për çfarë? – Publikohet telefonata ku është kërkuar hetim për Joe Biden
Presidenti i Shteteve të Bashkuara, Donald Trump, ka vazhduar sulmin e tij verbal kundër hetimit të telefonatës së tij me presidentin e Ukrainës, duke thënë “Impeachment, për çfarë?”. Sipas përmbledhje së një telefonate të publikuar nga vetë Administrata, Trump i ka bërë presion presidentit të Ukrainës që të hetojë rivalin politik, Joe Biden. Telefonata gjysmë-orëshe e zhvilluar në Korrik, shfaqi disa kërkesa dhe premtime të tjera që nuk kishin lidhje me Biden, përfshirë kërkesën për favor të Trump ndaj presidentit Zelenskiy në lidhje me polemikat nga fushata presidenciale e vitit 2016. Trump reagoi duke thënë se është pro publikimit të këtyre informacioneve dhe shtoi se kërkon të njejtën transparencë për Joe Biden.
Impeachment (Impiçment) për çfarë?. Unë nuk e kam bërë. Po të dëgjoni telefonatën, është perfekte. Unë e mbështes transparencën e këtyre informacioneve, pavarësisht se ishte informacion i dorës së dytë. Por unë këmbëngul gjithashtu për transparencë nga Joe Biden dhe djali i tij, për miliona dollarë që janë zhvendosur fare shpejtë dhe lehtë nga Ukraina dhe Kina. Po flas për miliona, miliona dollarë, të nxjerra shumë shpejtë, kur ai ishte zv/President. Une mendoj se duhet transparencë për këtë, tha ai.
Përmbledhja u publikua një ditë pasi Kryetarja e Dhomës së Përfaqësuesve, Nancy Pelosy, tha se është nisur procedura formale e hetimit për shkarkim, çka do të kërcënojë presidencën e Trump ndërkohë që bën fushatë për rizgjedhje në vitin 2020. Detajet e telefonatës së 25 Korrikut tërhoqën reagime të ashpra nga demokratët, që e akuzojnë Trump për kërkesën e ndihmës nga jashtë, në përpjekje për të njollosur Joe Biden, garuesin kryesor demokrat. Telefonata ndodhi pasi Trump kishte urdhëruar një ngrirje të thuajse 400 milionë dollarë ndihma amerikane drejt Ukrainës, që administrata i vuri në dispozicion më vonë.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.