Trump kërcënon Penianin – “Nëse detyrohemi do ta shkatërrojmë plotësisht Korenë e Veriut”
Presidenti amerikan, Donald Trump, e filloi adresimin e tij përpara Asamblesë së Përgjithshme të Kombeve të Bashkuara, duke përmendur arritjet e ekonomisë më të madhe në botë, përgjatë mandatit të tij.
“Kompanitë amerikane po rikthehen në vend, duke krijuar vende pune me hapin më të shpejtë, që nuk e kemi parë prej shumë vitesh. Aksionet në Wall Street janë në nivelin më të lartë historik, ndërsa papunësia qëndron shumë e ulët. Sapo kemi njoftuar se do të shpenzojmë rreth 700 miliardë dollarë për ushtrinë dhe mbrojtjen. Shumë shpejt ushtria jonë do të jetë më e fortë se kurrë më parë”.
Më pas, fjalimin e tij presidenti Trump e përqendroi te siguria globale, dhe i bëri thirrje të gjithë liderëve të kombeve, të pranishëm në asamblenë e përvitshme, të qëndrojnë së bashku kundër regjimeve komuniste, si Korea e Veriut dhe Irani.
“Terroristët dhe ekstremistët janë fuqizuar dhe janë përhapur në çdo rajon të planetit. Regjimet komuniste në vende të ndryshme, jo vetëm që mbështesin terrorizmin, por kërcënojnë kombet dhe njerëzit me armët më shkatërruese që ka njohur njerëzimi. SHBA ka forcë dhe durim të madh, por nëse detyrohet të mbrojë veten dhe aleatët e saj, nuk do të kemi zgjidhje tjetër veçse të shkatërrojmë plotësisht Korenë e Veriut”.
Gjithashtu, presidenti Trump paralajmëroi edhe vendet e tjera, që ai i quajti “një grup regjimesh mashtrues”, si Irani, Siria dhe Venezuela, që sipas tij paraqesin kërcënim për globin.
Më tej, Trump përsëriti edhe një herë nevojën për reformim të Kombeve të Bashkuara dhe të organizatave të tjera ndërkombëtare, me argumentin se duhet të bëjnë më shumë me paratë që marrin.
Lidion Kulla/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.