Trump kërcënon Turqinë: “Do i shkatërrojmë ekonomikisht nëse sulmojnë kurdët”
Presidenti i Shteteve të Bashkuara, Donald Trump, kërcënoi Turqinë me shkatërrim ekonomik nëse sulmon aleatët kurdë të SHBA në Siri. Komentet sollën rënien e lirës turke dhe kritika të mëdha nga Ankaraja.
Marrëdhëniet mes 2 aleatëve të NATO janë përkeqësuar prej mbështetjes së trupave kurde në Siri nga Shtetet e Bashkuara, që Turqia i sheh si një zgjerim të Partisë së Punës së Kurdistanit. Kriza diplomatike e vitit të kaluar, ku Trump vendosi sanksione ndaj 2 ministrave të presidentit Erdogan dhe rriti tarifat në eksportet e metaleve, bëri që lira turke të prekte nivel rekord të ulët.
Trump bëri të ditur se SHBA ka nisur tërheqjen e trupave nga Siria, gjë që e lajmëroi në Dhjetor. “Ne do të sulmojmë përsëri nëse është nevoja nga një bazë ekzistuese në terren. Ne do të shkatërrojmë ekonomikisht Turqinë nëse ata godasin kurdët. Krijoni një zonë të sigurisë prej 20 milje. Gjithashtu, nuk dua që kurdët të provokojnë Turqinë”, shkroi Trump në Twitter. Lira ra me 1.6% në 5.5450 kundër dollarit amerikan.
Ndërkohë, ministri i jashtëm turk. Mevlut Cavusoglu tha se Trump nuk ka për të arritur gjë nga kërcënimet ekonomike “Ne kemi përsëritur disa herë se nuk do të kemi frikë ndaj kërcënimeve dhe nuk do t’i përulemi.
Kështu që nuk mund të arrihet asgjë nëse kërcënohet Turqia ekonomikisht. Ne duhet të vendosim se si të koordinojmë zgjidhjen e kësaj çështjeje me çdo kusht”, tha Mevlut Cavusoglu. Trump nuk dha detaje për propozimin e zonës së sigurt. Ai lajmëroi muajin e kaluar se do të tërheqë forcat amerikane nga Siria, duke deklaruar se misioni për të mposhtur Shtetin Islamik ka përfunduar me sukses.
Ministri turk tha se nuk është kundër idesë së një “zone të sigurt” përgjatë kufirit, por shtoi se partnerët strategjikë nuk duhet të komunikojnë në media sociale. Kurdët kanë qenë aleat të SHBA në luftën kundër xhihadistëve. Erdogan ka premtuar se do t’i godasë ata, pas vendimit të Trump për të tërhequr trupat nga rajoni.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.