Trump kryeministrit italian Conte: “Do doja të përfundohej gazsjellësi TAP”
Presidenti i Shteteve të Bashkuara mbështet realizimin e projektit të gazsjellësit TAP dhe ia ka shprehur këtë edhe kryeministrit italian Giuseppe Conte, gjatë një takimi të përbashkët në Uashington.
“Sa i përket gazsjellësit, do doja të shihja diçka konkurruese dhe shpresoj që kryeministri do të arrij ta bëjë dhe ta përfundojë”, u shpreh Trump.
Presidenti amerikan shprehu dëshirën për të ulur varësinë e Europës nga gazi rus edhe gjatë samitit të NATO-s, ndaj TAP do të shërbente pikërisht për këtë qëllim, duke qenë se transporton drejt kontinentit gazin natyror që rrjedh nga fushat e Azerbajxhanit.
Nga ana e tij, kryeministri italian u shpreh se qeveria është e vetëdijshme për faktin se TAP është një vepër strategjike, por sipas Contes ka disa trazira në komunitetet lokale.
Për realizueshmërinë e TAP duket se janë bindur javët e fundit edhe liderët e partive të mazhorancës në Itali, të cilat më parë donin ta bllokonin si projekt.
Tashmë TAP duket se do të përfundojë pa asnjë pengesë brenda afateve kohore, ndërsa mediat italiane raportojnë edhe për uljen e shqetësimeve mes banorëve të Puglias.
Vëmendja e veçantë e marrë nga ana e SHBA për gazsjellësin është konsideruar si arritje ndërkohë në Azerbajxhan.
A.H./SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.