“Trump mban në errësirë ekipin e tranzicionit”, Biden: Presidenti ka bllokuar informacionin nga agjencitë, e papërgjegjshme
Presidenti i zgjedhur Joe Biden, tha në nisje të Javës se shumë prej agjencive amerikane të sigurisë janë dobësuar nën presidencën e Donald Trump dhe se mungesa e informacionit ndaj ekipit të tij nga administrata që po largohet është e papërgjegjshme. “Kemi pasur bllokada nga lidershipi politik në Departamentin e Mbrojtjes dhe Zyrën për Manaxhimin dhe Buxhetin”, – tha Biden pas një takimi ekipin e tij të politikave të jashtme. Ai tha se nuk po marrin informacionin e nevojitur nga administrata që po largohet në fusha të rëndësishme të sigurisë kombëtare dhe se kjo është e papërgjegjshme.
Biden mposhti Trump në zgjedhjet e 3 Nëntorit, por ekipi i tranzicionit ka nisur të takojë zyrtarë të administratës në fund të muajit Nëntor, për të koordinuar dorëzimin e pushtetit. Trump ka refuzuar të pranojë mposhtjen dhe administrate e tij ka autorizuar bashkëpunimin me Biden më 23 Nëntor. Më herët gjatë muajit, ekipi i Biden bëri të ditur se është përballur me rezistencë ndaj kërkesave për informacion tek disa zyrtarë të Pentagonit. Zyrtarë të mbrojtjes deklaruan javën e kaluar se Pentagoni ka përfunduar 163 intervista dhe 181 kërkesa për informacion dhe do vazhdojë të ofrojë takime dhe të dhëna. Megjithatë, Biden përsëriti shqetësimet se administrate e Trump ka shkaktuar dëme serioze tek shumë agjenci amerikane.
Klevis Llaha / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.