Trump mbron Arabinë Saudite – Nuk do të prishë marrëdhëniet prej vrasjes së Khashoggi
Presidenti i Shteteve të Bashkuara, Donald Trump, tha se nuk do të shkatërrojë ekonominë globale duke ushtruar presion ndaj Arabisë Saudite mbi vrasjen e gazetarit amerikan, Jamal Khashoggi, pavarësisht se Agjencia Qendrore e Inteligjencës mendon se vrasja e gazetarit u ekzekutua nën urdhrin e princit trashëgimtar.
Trump përmendi politikat e tij “Amerika e Para” për mos prishjen e marrëdhënieve me Arabinë Saudite dhe hodhi poshtë komentet e Washington Post se ai po vendos përpara interesat e tij tregtare me Mbretërinë. “Gjithçka ka të bëjë me Amerika e Para. Ne nuk do të anulojmë porosi prej qindra miliardë dollarësh në pajisje ushtarake dhe t’ia japin këto Kinës dhe Rusisë.
Nëse prishim marrëdhëniet me Arabinë Saudite, çmimet tuaja të naftës do të rriteshin ndjeshëm” – ka deklaruar Trump Presidenti shtoi se Arabia Saudite është prodhuesi i dytë më i madh i naftës në botë dhe se ka bashkëpunuar me Shtetet e Bashkuara për të mbajtur të ulëta çmimet e naftës.
Sipas tij, nëse do të prishej marrëdhënia me Mbretërinë, çmimet do të arrinin në 100 – 150 dollarë për fuçi, diçka që do të ishte përfituese për Rusinë. Trump tha se Mbretëria paguan 400 miliardë dollarë për të blerë produkte dhe investuar në Shtetet e Bashkuara dhe se nuk dëshiron që kjo para të shkojë drejt Rusisë dhe Kinës.
Ndërsa pyetej për vrasjen e gazetarit dhe dyshimeve për përfshirjen e princit trashëgimtar, Trump tha se agjencia nuk ka një rezultat përfundimtar mbi çështjen. “Agjencia ka hetuar shumë mbi çështjen, por nuk kanë diçka përfundimtare. Mbase e ka bërë, mbase jo. Ka të bëjë gjithçka me Amerika e Para.
Arabia Saudite na paguan 400 miliardë dollarë për të blerë dhe investuar në vendin tonë dhe unë nuk do të lejojë që Rusia dhe Kina të përfitojë miliarda duke prodhuar pajisje ushtarake. Përveç kësaj, ata kanë bashkëpunuar me ne për të ulur çmimet e naftës, pasi do të rriteshin në 150 dollarë për fuçi”. – deklaroi presidenti Trump i bëri komentet pasi vazhdoi të mbrojë Riadin, pavarësisht se politikanët në Shtetet e Bashkuara kanë bërë thirrje që Administrata e Trump të ndëshkojë ashpër Arabinë Saudite.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.