Trump ndalon sulmin ndaj Iranin – “I thashë stop 10 minuta përpara se të ndodhte, do vdisnin 150 njerëz”
Presidenti amerikan Donald Trump deklaroi se vendosi të tërhiqej nga plani për sulme ushtarake ndaj Iranit për shkak se ky sulm do të mund të linte rreth 150 viktima iraniane. Tensionet mes palëve u përshkallëzuan ndjeshëm pas rrëzimit që i bëri Irani një droni ushtarak amerikan.
Teherani pretendon se, droni u qëllua pasi shkeli hapësirën ajrore iraniane, ndërkohë që $ashingtoni pretendon se ishte në zonë ndërkombëtare, mbi ngushticën e Hormuzit. Trump nënvizoi se është i hapur për bisedime me Iranin. Incidenti në fjalë rriti ndjeshëm frikën për një përplasje ushtarake mes dy shteteve. Kjo gjë nxiti edhe një rritje të ndjeshme të çmimeve të naftës. Deklarata e Donald Trump se anuloi planin për sulme ushtarake në 3 qytete iraniane sinjalizon se, numri një i Shtëpisë së Bardhë kërkon një zgjidhje diplomatike për këtë përplasje.
Përplasja në fakt zgjat prej javësh, pasi Washingtoni akuzon Teheranin se ka sulmuar disa anije cisternë në gjirin persik. “Unë nuk po kërkoj luftë, dhe në rast se do të ketë, atëherë do të shihni shkatërrim si asnjëherë më parë, por unë nuk e dua këtë”-shtoi Donlad Trump. Presidenti amerikan ka publikuar edhe një sërë njoftimesh në rrjetet sociale duke pretenduar në njërin prej tyre, se ishte ai që ndaloi sulmin vetëm 10 minuta përpara se të ndodhte.
“Nuk jam në nxitim, ushtria jonë është më e mira në botë deri tani”-shkruan ai.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.