Trump paralajmëron Iranin – “Mos kërcënoni SHBA, përndryshe do të vuani pasoja”

Presidenti i Shteteve të Bashkuara, Donald Trump, ka paralajmëruar presidentin e Iranit, Hasan Rouhani, që të mos kërcënojë Shtetet e Bashkuara, përndryshe do të përballet me pasoja. Kjo vjen pasi Rouhani i tha Trump se politikat armiqësore kundrejt Teheranit, mund të shkaktojnë “luftën më të madhe të të gjitha kohërave”. “Mos kërcëno më kurrë Shtetet e Bashkuara përndryshe do të vuash pasoja, që askush në histori nuk i ka përjetuar ndonjëherë”, paralajmëroi Trump në një publikim në Twitter.

Rritja e tensioneve vjen ndërkohë që administrata e Trump ka nisur  komunikime agresive për t’i bërë presion Iranit që të përfundojë programin bërthamor. Irani është përballur me presion nga Shtetet e Bashkuara dhe kërcënimin e sanksioneve, pas vendimit të Trump për të tërhequr SHBA nga marrëveshja ndërkombëtare për programin bërthamor të Iranit. Teherani k bërë të ditur se janë ndërmarrë punime për gjenerimin e energjisë elektrike dhe projekte të tjera paqësore.

Sekretari i Shtetit, Mike Pompeo, i përshkroi liderët e Iranit si “mafia” dhe premtoi mbështetje për iranianët që nuk janë të kënaqur me qeverinë. Në një fjalim përballë diplomatëve të Iranit, Rohani kërcënoi Trump për veprimet e administratës së tij, duke thënë se do të pendohet.  Presidenti u tall gjithashtu me kërcënimet e Trump për të ndaluar eksportet e naftës duke thënë se Irani ka një pozicion dominues në Gjirin Persik  dhe ngushticën e Hormuzit, që është një rrugëkalim i rëndësishëm i dërgesave të naftës në det.

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.