Trump-Putin shtrëngojnë duart – Merkel i bën thirrje liderëve të G20 për kompromis
Presidenti amerikan, Donald Trump dhe ai rus, Vladimir Putin janë takuar për herë të parë mes tyre, duke shtrënguar duart përpara fillimit të samitit të G20 në Hamburg.
Të dy udhëheqësit deklaruan se do të përpiqen të rregullojnë marrëdhëniet mes dy vendeve, që janë dëmtuar ndjeshëm pas akuzave të SHBA se Rusia ka ndërhyrë në rezultatin e zgjedhjeve amerikane.
Ndryshimet klimatike dhe tregtia do të dominojnë samitin 2-ditor. Ndërkohë, në fjalimin hapës të samitit, kancelarja gjermane, Angela Merkel, i ka bërë thirrje liderëve të 20 vendeve më të industrializuara të botës, që të arrijnë kompromis mbi çështjet kryesore që do të diskutohen.
“Të gjithë i dimë sfidat me të cilat përballet globi dhe e dimë që koha nuk pret. Për këtë arsye, zgjidhjet mund të gjenden vetëm nëse jemi të gatshëm për kompromis dhe nëse lëvizim së bashku në të njëjtin drejtim”, deklaroi Merkel.
Në fjalën e saj, kancelarja Merkel bëri thirrje për arritjen e marrëveshjeve mbi ekonominë, tregtinë, ndryshimet klimatike dhe energjinë e gjelbërt.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.