Trump rikthehet në publik. Hera e parë që kur del nga spitali. Energjik për të rinisur fushatën
Presidenti i Shteteve të Bashkuara, Donald Trump bëri daljen e parë në publik që kur u diagnostikua me Covid-19, duke i folur mbështetësve të tij tek Shtëpia e Bardhë. Duke qëndruar vetëm dhe pa veshur maskë, presidenti republikan foli nga ballkoni i Shtëpisë së Bardhë, ku i kërkoi një grumbulli prej rreth 100 mbështetësve kryesisht me ngjyrë dhe latino-amerikanë, që ta ndihmojnë në zgjedhjet e 3 Nëntorit. Shfaqja e tij, ndërkohë që ka ende pyetje mbi infektueshmërinë, shihet si hapi i parë drejt rinisjes së fushatës së plotë javën e ardhshme. Ai do të shkojë në Florida, Pensilvani dhe Iowa gjatë Javës.
Trump dha një fjalim relativisht të shkurtër, ku mbrojti historikun e tij në luftën kundër krimit dhe nxitjen e ekonomisë amerikane, ndërkohë që kritikonte demokratët. “Unë ndihem mirë”,- i tha Trump mbështetësve që ishin mbledhur tek Shtëpia e Bardhë. Shumica e tyre kishin vendosur maska, por dështuan të mbanin rregullat e distancimit social. Kjo ishte hera e parë që presidenti u shfaq në publik që kur u doli nga qëndrimi 3-ditorë në spital ditën e Hënë. Shtëpia e Bardhë nuk ka publikuar rezultate të testeve të fundit të Covid-19 të Trump dhe ka refuzuar të thotë se kur u testua negativ për herë të fundit.
Klevis Llaha / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.