Trump rikthehet në Shtëpinë e Bardhë / “Mbase jam imun”, tha presidenti pasi mori trajtim për Covid-19
Presidenti i Shteteve të Bashkuara, Donald Trump, u largua nga qendra mjekësore Ëalter Reed për t’u rikthyer në Shtëpinë e Bardhë. Trump ka qëndruar 4 ditë në spital, ku është trajtuar për Covid-19 me oksigjen dhe barna eksperimentale. I veshur me maskë, presidenti doli nga spitali drejt një limuzine, që e çoi tek helikopteri Marine One, për një fluturim të shkurtër për në Shtëpinë e Bardhë. Pasi mbërriti, presidenti postoi një video në media sociale, ku u përpoq të zbuste frikën ndaj koronavirusit.
“Mos e lini t’ju dominojë. Mos u frikësoni nga virusi. Ju do ta mposhtni. Kemi mjekimet më të mira që janë zhvilluar së fundmi. Ne jemi vendi më i madh në botë dhe do rikthehemi në punë. E di që ka rrezik, por është ok dhe unë ndihem më mirë. Mbasë kam imunitet, nuk e di. Por mos e lini t’ju dominojë jetën. Dilni jashtë, por me kujdes.”
Gjendja shëndetësore e Trump ka qenë subjekt i spekulimeve të mëdha në tre ditët e fundit, ndërkohë që disa ekspertë theksuan se presidenti i përkiste kategorisë që zhvillon ndërlikime të ashpra nga sëmundja, pasi është i moshuar dhe në mbipeshë. Rritja e numrit të rasteve me Covid-19 tek Shtëpia e Bardhë si dhe në Kongres, ngre më shumë kritika mbi kundërpërgjigjen e Trump ndaj pandemisë. Pavarësisht se doktorrët e tij thanë se ai nuk ka dalë ende nga rreziku, Trump hoqi maskën në Shtëpinë e Bardhë, ndërsa pozonte për fotografi.
Klevis Llaha / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.