Trump: SHBA ‘nuk do të merret më’ me ambasadorin e Mbretërisë së Bashkuar
Presidenti i SHBA, Donald Trump tha të hënën mbrëma se “nuk do të merret më” me ambasadorin britanik në Shtetet e Bashkuara, pas lajmit të fundjavës që thoshte se diplomati britanik e kishte përshkruar administratën e Trump si jofunksionale, të ngathët dhe të paaftë. “Unë nuk e njoh ambasadorin, por ai nuk pëlqehet dhe nuk ka mendim të mirë brenda SHBA-së. Ne nuk do të merremi më me të,” tha Trump në një postim në Twitter.
Ai gjithashtu kritikoi kryeministren në largim Theresa May, duke e përshkruar mënyrën e saj të realizimit të Brexit si “një rrëmujë”. Në memorandumet konfidenciale të qeverisë britanike që datojnë nga viti 2017 deri në të tashmen, ambasadori i Britanisë së Madhe në Shtetet e Bashkuara Kim Darroch thotë se Trump “rrezaton pasiguri” dhe këshillon zyrtarët në Londër që të merren me të në mënyrë efektive, raportoi Reuters të hënën.
Qeveria e Britanisë i ka thënë Washingtonit se bërja publike e këtyre memorandumeve, ishte një çështje keqardhjeje, tha zëdhënësi i May të hënën. Edhe ministrat e tjerë nuk i bashkohen pikëpamjeve të Darroch në lidhje me qeverisjen e Trump. Një hetim është në proces për të përcaktuar se kush ishte pas zbulimit të dytë të rëndë të një materiali konfidencial gjatë këtij viti. (Reuters)
Edel Strazimiri / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.