Trump shtrohet në spital – Do të ushtrojë detyrën nga suita personale

“Po ja dal mirë, besoj”-thotë Donald Trump në rrjetet sociale, ndërkohë që është shpërngulur në një spital ushtarak, pas diagnostikimit me Covid-19. Rreth 17 orë pas njoftimit të tij se ka rezultuar pozitiv, Donald Trump u pa të ecte ngadalë nga ambientet e Shtëpisë së Bardhë drejt helikopterit i cili e transportoi në spitalin ushtarak, Walter Reed në Maryland. Në një video menjëherë të postuar në Twitter ai u shpreh se. “Besoj se po ja dal mirë, por do të sigurohemi që gjërat të ecin”.

Presidenti i ekonomisë numër një të botës do të vazhdojë të zhvillojë detyrën e tij nga një suitë në spital. Sipas burimeve brenda Shtëpisë së Bardhë, presidenti amerikan ka një temperaturë të lehtë ndërkohë që shpërngulja e tij në spital u bë për çështje të kujdesit paraprak. Sipas mjekut të Shtëpisë së Bardhë ndërkohë, Sean Conley, Presidenti është duke u kuruar me një trajtim eksperimental. Infektimi i Trump i ka komplikuar së tepërmi gjërat, sidomos në kampin republikan. Me zgjedhjet e 3 nëntorit në prag, republikanët mund të detyrohen të zëvendësojnë kandidaturën e tyre, në rast se gjendja shëndetësore e Trump do të rëndohej.

Roel Korkuti / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.