Trump sulmon Biden – “Amerika e tij do të jetë e pasigurtë për qytetarët”

Presidenti amerikan, Donald Trump ka pranuar formalisht nominimin e republikanëve si kandidatura e tyre për zgjedhjet e ardhshme presidenciale, që do të mbahen më 3 nëntor, e ku përballë do të ketë demokratin Joe Biden. Në fjalimin përmbyllës në konventën e republikanëve, Trump u tregua shumë i ashpër me kundërshtarin e tij, duke thënë se Shtetet e Bashkuara të Amerikës nën drejtimin e Joe Biden do të shkatërroheshin.

Sipas tij, fitorja e demokratëve në nëntor vetëm sa do të përkeqësonte tensionet raciale dhe situatën me pandeminë. Biden, në këndvështrimin e Trump është një ekstremist i majtë i cili do ta zhyste vendin në anarki ligji. “Këto zgjedhje do të vendosin nëse ne mbrojmë amerikanin i cili i bindet ligjit, apo nëse duam t`i japim dorë të lirë anarkistëve dhe kriminelëve të cilët kërcënojnë qytetarët tanë”-deklaroi Trump duke përdorur në favor të fushatës së tij protestat e dhunshme që po zhvillohen në vend pas incidinetit me Jacob Blake. “Askush nuk do të jetë i sigurtë në Amerikën e Biden”-shtoi presidenti amerikan.

Roel Korkuti / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.