Trump sulmon “egërsisht” Biden. Kandidati më i keq në histori. Rikujton se është nominuar për Nobel

Presidenti Donald Trump ka shtuar sulmin ndaj rivalit demokrat Joe Biden, duke e cilësuar ish-zv/presidentin “kandidatin më të keq në historinë e politikave presidenciale”, gjatë një fjalimi në Michigan.

“E imagjinoni dot nëse humbas ndaj tij? Do them që humba ndaj kandidatit më të keq në histori. Michigan, mos ma bëni këtë. Joe Biden ka prezantuar platformën më ekstreme dhe nuk është ideja e tij, është e radikalëve të majtë.”  

Trump përsëriti kritikat për Biden në raport me Kinën, duke e akuzuar si një globalist të shitur, që ka mbështetur humbjen e vendeve amerikane të punës.   Fushata e Trump ka akuzuar gjithashtu Biden dhe garuesen e tij, Kamala Harris, për kundërshtimin e përpjekjeve të administratës së tij për të miratuar shpejtë një vaksinë për koronavirusin.  Trump ka shtuar udhëtimet e fushatave, 2 muaj përpara zgjedhjeve kombëtare.   Gjatë fjalimit të tij, Trump rikujtoi se është nominuar për çmimin Nobel për paqe një ditë më parë dhe shtoi se mediat nuk e kanë mbuluar lajmin e nominimit.

“Nuk e them prej egos, por unë jam nominuar për çmimin Nobel për paqe.  Kjo është diçka e madhe, por rrjetet dhe pjesa më e madhe e mediave nuk e mbuluan.”  

Politikani nga norvegjia, Christian Tybring-Gjedde, një deputet i djathtë, nominoi Trump për çmimin pasi ka ndihmuar në ndërmjetësimin e marrëveshjes mes Izraelit dhe Emirateve të Bashkuara Arabe. Kjo është hera e dytë që ai nominon Donald Trump.  Mijëra njerëz mund të nominojnë kandidatë për çmimin Nobel për paqe, përfshirë deputetë, qeveri, profesorë dhe ish-fitues të çmimit.

Klevis Llaha / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.