Trump sulmon FED – Rritja e normave të interesit e gabuar, banka nuk po mbështet ekonominë

Presidenti amerikan, Donald Trump deklaroi se nuk është aspak i entuziasmuar nga vendimet më të fundit të Rezervës Federale për rritjen e normave të interesit dhe as nga i zgjedhuri i tij për të drejtuar institucionin, Jerome Powell. Sipas tij, Rezerva Federale duhet të bëjë më shumë për të nxitur ekonominë e vendit.

Në qendër të përplasjeve tregtare ndërkombëtare, Trump akuzoi edhe Kinën me Europën për manipulim të monedhave respektive. Është e rrallë që një President amerikan të kritikojë publikisht punën e Rezervës Federale, dhe ndërhyrja e Trump është e paprecedentë në këtë drejtim.  Pavarësia e institucionit qendror të politikave monetare  është parë gjithmonë si guri i themelit i stabilitetit ekonomik.

Rezerva Federale duhet të ndjekë politika më akomoduese mbi normat e interesit”-nënvizoi Donald Trump. Bursat amerikane ranë menjëherë pas këtyre deklaratave ndërkohë që dollari amerikan humbi terren ndaj shportës së valutave kryesore. Sipas presidentit amerikan, shtetet e tjera përfitojnë  nga bankat e tyre qendrore në kohë bisedimesh të ashpra tregtare, ndërkohë që FED nuk e mbështet sa duhet vendin.

Roel Korkuti/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.