Trump vë në diskutim edhe raundin e shtatorit për marrëveshje tregtare me Kinën
Presidenti amerikan Donald Trump tha të premten mbrëma se nuk ishte i gatshëm të bënte një marrëveshje me Kinën dhe madje vuri në diskutim edhe raundin e shtatorit të bisedimeve tregtare. Trump gjithashtu tha se Shtetet e Bashkuara nuk do të bëjnë biznes me gjigantin e telekomit kinez Huawei Technologies.
Më vonë një zyrtar i Shtëpisë së Bardhë sqaroi se ai po i referohej një ndalimi të blerjeve të pajisjeve Huawei nga qeveria amerikane, e jo kërkesave për shitje nga Kompanitë amerikane, të cilat ende po vlerësohen. “Ne po flasim me Kinën. Ne nuk jemi të gatshëm të bëjmë një marrëveshje, por do të shohim se çfarë do të ndodhë, “u tha Trump gazetarëve në Shtëpinë e Bardhë.
Lidhjet midis dy ekonomive më të mëdha në botë janë përkeqësuar në mënyrë dramatike që kur Trump njoftoi se në 1 shtator do të vendosë një tarifë 10% në importet kineze me vlerë 300 miliardë dollarë, duke bërë që Kina të ndalojë blerjet e produkteve bujqësore të SHBA-ve. “Ka qenë një javë shumë e paqëndrueshme ekonomike,” tha Elwin de Groot, shefi i makro strategjisë së Rabobank. “Deri para pak kohësh, mendimi i tregjeve ishte se kjo luftë tregtare do të zgjidhet, por qartësisht tani mendimi është se mbase nuk është kështu”.
Edhe pse sipas Trump negociatat e planifikuara në shtator mund të prisheshin, këshilltari i tregtisë në Shtëpinë e Bardhë Peter Navarro tha se megjithatë përgatitjet për bisedimet po vazhdonin. (Reuters)
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.