Trump zotohet të godasë çdo makinë europiane me tarifë 25%, por nuk jep kornizë kohore
Makinat europiane që vijnë në Shtetet e Bashkuara do të vendosen me taksa shtesë, sipas Presidentit të SHBA, Donald Trump.
“Do të vendosim një taksë prej 25 për qind në çdo makinë që vjen në Shtetet e Bashkuara nga Bashkimi Europian”, tha Trump në një tubim fushate në Virxhinianë Perëndimore.
Trump paralajmëroi së pari për tarifat e mundshme në makinat europiane në maj. Ai kërkoi nga Departamenti i Tregtisë të shqyrtojë nëse importet e tilla janë kërcënime ndaj sigurisë kombëtare, duke përdorur një argument të ngjashëm për të imponuar tarifa për importin e çelikut dhe aluminit.
Çmimi i një makine të re mund të kercejë nga 1.400 deri në 7.000 dollarë për modelet më të shitura nëse tarifat zbatohen, sipas raportit të Institutit Peterson për Ekonominë Ndërkombëtare në korrik. Hedhja më e lartë e çmimeve do të shihet në shitjet e makinave luksoze si Mercedes-Benz GLC-class, me 100 për qind të përmbajtjeve të huaja. Çmimi i saj mund të rritet nga 36.846 dollarë në më shumë se 45.400 dollarë.
Megjithatë, është e paqartë kur tarifat do të hyjnë në fuqi. Më herwt në një intervistë me Wall Street Journal, sekretari i Tregtisë Wilbur Ross tha se negociatat e vazhdueshme me BE, Meksikën dhe Kanadanë po vonojnë tarifat. Gazeta shtoi se Departamenti i Tregtisë po studion çështjen, dhe rekomandimet e tij ende nuk janë gati.
SHBA importuan më shumë se 200 miliardë dollarë në makina dhe kamionë të huaj vitin e kaluar, nga të cilat gati 80 për qind erdhën nga Meksika, Kanadaja, Japonia dhe Gjermania. Kompanitë e huaja të makinave si BMW dhe Toyota janë punëdhënës të mëdhenj në SHBA.
Firmat e makinave kanë thënë se tarifat do të çonin në më pak investime në SHBA dhe ulje të vendeve të punës. Sipas Institutit Peterson për Ekonomi Ndërkombëtare, madje edhe pa hakmarrje, tarifat e makinave mund të çojnë në humbjen e 195,000 vendeve të punës në SHBA.
E.Z/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.