Tsakalotos përgatit investitorët – “Më shumë besim për Greqinë pas përfundimit të ndihmave”

Ministri i Financave i Greqisë, Euclid Tsakalotos, tha se vendi ka kapacitet për t’u vetëfinancuar pas Gushtit,  pa pasur nevojë për ndihmë nëpërmjet lehtësimit të borxhit.

Ndërkohë që përgatitet për takime me investitorë në New York në ditët e ardhshme dhe në Azi gjatë Shtatorit, Tsakalotos tha se Greqia ka respektuar të gjithë premtimet ndaj kreditorëve.

Marrëveshja me ministrat e Financave të Eurozonës e arritur në muajin Qershor për të lehtësuar daljen nga paketa e fundit e ndihmave, ofroi pak qartësi dhe siguri për investitorët mbi Greqinë.

Kjo do të vlejë si për emetimin e një obligacioni 10-vjeçar të Qeverisë ashtu edhe për investimet e huaja direkte, tha Tsakalotos.

Ministri e ka nisur detyrën në vitin 2015, duke premtuar zbatimin e paketës së tretë të shpëtimit të Greqisë.

Homologët e tij në Eurozonë ranë dakord muajin e kaluar për të zgjatur maturitetet dhe faljen e interesave për 96 miliard euro borxh, që është sa 1/3-a e totalit të vendit.

Greqia ka normën më të lartë të borxhit në raport me Produktin e Brendshëm Bruto në Eurozonë, në thuajse 180%.

“Kërkoj të shpjegoj se pse duhet të kemi më shumë besim për Greqinë pas datës 21 Gusht kur të përfundojmë programin”, tha Ministri mbi takimin që do të zhvillojë me investitorët.

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.