Tsipras beson “mrekullinë” – “Në 2018 dalim nga `tutela`, jo më linja kreditimi”
Alexis Tsipras deklaroi se, Greqia do të kryejë një dalje të pastër nga programi i shpëtimit vitin e ardhshëm, dhe se nuk do t`i nevojiten më linja të tjera kreditimi.
Sipas kreut të ekzekutivit helen, Greqia do ta fitojë vetë diçka të tillë, dhe kjo është arsyeja se përse nuk do të ketë më nevojë për linja të tjera kreditimi.
Kryeministri grek shtoi se, Greqia ofron produkte të cilësisë së lartë, rrjet të mirë, infrastrukturë, profesionalizëm në bërjen e gjërave dhe mbi të gjitha kapacitet njerëzor për t’ia dalë.
“Për këtë arsye, angazhimi ynë kryesor janë reformat, që kanë për qëllim që të nxjerrin në pah avantazhet tona konkurruese”, nënvizoi Tsipras.
Recesioni i thellë ekonomik dhe programet e shpëtimit do të jenë një kujtim i largët për Greqinë, guxon të besojë dhe të premtojë Alexis Tsipras për popullin e tij.
Ndër premtimet e tij është edhe vullneti dhe angazhimi i qeverisë për ti dhënë fund masave shtrënguese.
Greqia do të ecë vetë, pa ndihmën e kreditorëve, dhe ky progres, sipas Tsipras, nuk ka për të ndodhur në rast se, pagat do të vijojnë të tkurren.
Kryeministri grek i bëri apel sipërmarrjes që të investojë në vend. “Tani, jo në të ardhmen”, shtoi ai.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.