Tuberkulozi/ OBSH: Rreth 1.4 milion njerëz nuk morën trajtimin e duhur për shkak të Covid-19!

Lufta kundër CoviD-19 po na tërheq përsëri në luftën kundër një infeksioni tjetër: tuberkulozit. Sipas Organizatës Botërore të Shëndetësisë, 1.4 milion më pak njerëz morën trajtimin e nevojshëm për të trajtuar këtë sëmundje të mushkërive në vitin 2020 krahasuar me vitin e kaluar. Pandemia ka shkaktuar ndërprerjen e shërbimeve thelbësore shëndetësore në vendet më të varfra dhe më të prekshme ndaj sëmundjes. Në Ditën Botërore të TB, e cila festohet në 24 Mars, ne po e shohim veten edhe një herë duke u marrë me efektet e Covid në urgjenca të tjera globale shëndetësore, të cilat kanë kaluar në plan të dytë vitin e fundit.

Tuberkulozi është një nga 10 shkaqet kryesore të vdekjeve në botë të shkaktuara nga një agjent i vetëm infektiv. Është një infeksion i mushkërive i shkaktuar nga bakteri Mycobacterium tuberculosis, i njohur gjithashtu si bacili i Koch (emëruar pas mjekut gjerman që e zbuloi atë). Çdo vit 10 milion njerëz preken nga kjo sëmundje, e cila vret 4,000 çdo ditë. Dy të tretat e rasteve ndodhin në tetë vende: Indi, Indonezi, Kinë, Filipine, Pakistan, Nigeri, Bangladesh dhe Afrika e Jugut.

Njerëzit me HIV kanë një rrezik 18 herë më të lartë të infeksionit TB, dhe kushte të tjera që dobësojnë sistemin imunitar, siç është kequshqyerja, gjithashtu rrisin shanset e tyre për tu prekur nga sëmundja. Në vitin 2019, 2.2 milion raste ishin të lidhura me ushqimin joadekuat.

Tuberkulozi përhapet nga personi në person me ajër; një e katërta e popullsisë botërore ka kontraktuar në heshtje infeksionin, por vetëm 5-10% e atyre që presin bakterin në formë latente do të zhvillojnë simptoma gjatë jetës së tyre. Shenjat e sëmundjes – kollë, ethe, djersitje natën, humbje peshe – mund të jenë të lehta për disa muaj, duke e bërë më të lehtë shtyrjen e diagnozës dhe përhapjen e infeksionit. Për fat të mirë, tuberkulozi është një sëmundje e shërueshme dhe e parandalueshme.

Trajtimi i ilaçeve përfshin administrimin e disa antibiotikëve për një periudhë të gjatë kohore (standardi është 6 muaj). Një kurë e plotë që respekton kohën e duhur është e rëndësishme për të shmangur fillimin e shtameve rezistente ndaj ilaçeve: për këtë arsye është e kuptueshme pse pandemia ka ndikuar kaq rëndë në aderimin e trajtimit. OBSH frikësohet se gjysmë milioni njerëz të tjerë vdiqën nga tuberkulozi në vitin 2020, të cilët nuk ishin në gjendje të merrnin një diagnozë ose të përfundonin trajtimet e nevojshme.

OBSH gjithashtu ka rekomanduar shqyrtimin sistematik të bakterit në disa kategori veçanërisht të rrezikuara: kontakte familjare të pacientëve me tuberkuloz, njerëz me HIV pozitiv, të burgosur, punëtorë të ekspozuar ndaj silikateve (siç janë minatorët). Ekziston gjithashtu një nevojë për të rritur parandalimin në popullatat e prekshme me qasje të kufizuar në shërbimet shëndetësore, të tilla si komunitetet më të varfra urbane, të pastrehët, emigrantët, refugjatët, komunitetet e largëta dhe të izoluara dhe grupe të tjera të mbajtura në kufijtë e shoqërisë.

Fillimi i tuberkulozit mund të parandalohet me disa ilaçe që do të administrohen tek ata që vuajnë nga infeksioni i fshehtë (d.m.th. ende pa simptoma) ose me një vaksinë të gjallë të zbutur (e ashtuquajtura bacil Calmette Guérin), e dobishme për parandalimin e formave të rënda infantile të sëmundjes në foshnje dhe fëmijë, që përdoret në vendet me një incidencë të lartë të sëmundjes. (Focus)

Edel Strazimiri / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.