Turistët do të rriten me 37% – WTTC: Në vitin 2028 edhe shpenzimet do të rriten me 64%

Turistët në vendin tonë gjeneruan plot 235.5 miliardë lekë gjatë vitit të kaluar. Kjo shifër pritet të rritet me 3.6% këtë vit, ashtu siç projektohet të rritet lehtë edhe numri i turistëve, thotë Këshilli Botëror i Turizmit në raportin e posaçëm për vendin tonë për 2018 dhe që shkon deri në vitin 2028.

Këtë vit pritet që numri i turistëve të prekë 4.854.000. Pikërisht 10 vite më vonë, projektohet që, numri i turistëve të huaj që vizitojnë Shqipërinë të rritet në 6.6 milionë, duke gjeneruar shpenzime në vlerën e 387.4 miliardë lekëve, çka përkthehet në 4.77% rritje mesatare çdo vit, dhe 37.5% rritje në krahasim me sot. Projeksionet duken shumë premtuese, por mbetet për t`u parë nëse do të realizohen.

I njëjti raport, nënvizonte edhe faktin se, në Shqipëri  në krahasim me fqinjët, turizmi ka peshën më të lartë në ekonomi, por se, nga ana tjetër është vendi që investon më pak në sektor. Me mungesën e investimeve rritja e sektorit mbetet një sfidë mjaft e madhe.

Këshilli Botëror i Turizmit arrin në përfundimin se, 73.3% e parave që të huajt shpenzojnë në vendin tonë janë për qejf, ndërkohë që vetëm 26.7% janë për punë. Sa i përket shpenzimeve të të huajve në vend, Shqipëria me rreth 2 miliardë dollarë në 2017 qëndron mbi Malin e Zi dhe mbi Bosnje Hercegovinën, me thuajse dy herë më shumë para të shpenzuara. Në terma përqindje ndërkohë, Shqipëria është e para në rajon.

Roel Korkuti/SCAN

Turizmi, në 10 vjet do të punësojë 120 mijë njerëz – Do të zërë 10.8% të PBB

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.