Turizmi, 83% në vend – Shqiptarët pakësuan udhëtimet jashtë gjatë vitit 2018

Rreth 83% e turizmit të shqiptarëve zhvillohet brenda vendit. Instituti i Statistikave publikuar për herë të parë rezultatet e anketës së turizmit, “pushime dhe udhëtime 2018”, që përfshiu intervista të kryera me rreth 8 mijë familje, në të gjithë Shqipërinë. Shifrat treguan se për vitin e kaluar shqiptarët i pakësuan udhëtimet dhe sidomos ato jashtë vendit. Të dhënat e Instat nuk detajojnë numrin e saktë të udhëtimeve të kryer për qëllime pushimesh ose kohë të lirë, megjithatë në tërësi numri i udhëtimeve për qëllime personale mund të jetë një përafrues i ecurisë së turizmit brenda dhe jashtë vendit.

Nga 830 mijë udhëtime për arsye personale jashtë vendit që ishin kryer në vitin 2017, në vitin 2018 numri i tyre ra në rreth 730 mijë. Ndërkohë, udhëtimet për arsye personale brenda vendit u rritën ndjeshëm në 3.6 milionë, nga 3.27 milionë në vitin 2017.

Brenda Shqipërisë, destinacionet më të shpeshta të udhëtimeve janë Tirana, me 27% të totalit, e ndjekur nga Korça me 12% dhe Vlora me 11%. Në udhëtimet brenda vendit, 64% e shqiptarëve qëndrojnë në shtëpitë e të afërmve apo miqve, ndërsa pjesa e mbetur shfrytëzojnë hotelet, apartamentet me qira apo shtëpitë e dyta.

Ndërkohë, për udhëtimet jashtë destinacioni i parë ngelet Greqia, me 7.3%, i ndjekur nga Italia me 4.3%. Megjithatë, gjatë vitit të kaluar është regjistruar një rritje e ndjeshme e udhëtimeve drejt destinacioneve turistike të largëta, si drejt Tajlandës, me afro 80% më shumë apo Emirateve të Bashkuara Arabe, me 57% më shumë.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.