Turizmi dhe numri i të huajve në 2017-ën – Biznesi: Një vit shumë pozitiv, më tepër përkushtim e seriozitet
Sipërmarrja turistike shprehet e kënaqur me fluksin e turistëve që kanë zgjedhur sivjet të vizitojnë Shqipërinë.
Ministrja e Zhvillimit Ekonomik, Turizmit, Tregtisë dhe Sipërmarrjes, Milva Ekonomi ka shpërndarë opinionin e një prej përfaqësuesve të këtij sektori, i cili operon në Durrës, vend që ka përfituar më së shumti nga shtimi i vizitorëve të huaj që vijnë me paketa turistike.
Sokol Hoxha shprehet se ka pasur një rritje të konsiderueshme të vizitorëve polakë dhe se Shqipëria tashmë është një destinacion i konsoliduar në tregun e Polonisë. Po ashtu, të shumtë kanë qenë edhe pushuesit nga Bosnje dhe Hercegovina.
Sipas tij, shtimi i turistëve ka shtuar njëkohësisht edhe përgjegjshmërinë e bizneseve të cilat kanë shfaqur më tepër përkushtim dhe seriozitet.
“Turizmi është kthyer tashmë në një motor zhvillimi për ekonominë kombëtare. Së bashku me sektorin privat po përpiqemi me të gjitha mundësitë që #ShqipëriaTuristike të vijojë përmirësimin dhe t’u përgjigjet kërkesave në rritje të vizitorëve të huaj. Shembujt pozitiv nuk mungojnë, por duhet të përpiqemi bashkërisht më shumë për ta konfirmuar vendin tonë si destinacionin turistik të momentit”, e ka komentuar kështu ministrja Ekonomi momentin e mirë që po kalon turizmi.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.