Turizmi në zonat e mbrojtura – Pritet rritje e numrit të vizitorëve. Ngrihen 8 qendra të reja informimi
Turistët të cilët do të zgjedhin të vizitojnë zonat e mbrojtura këtë vit, do ta kenë më të lehtë të informohen mbi bukuritë natyrore, vlerat dhe gjithçka që ofrojnë secila prej tyre. Në një intervistë për televizionin SCAN, kreu i Agjencisë Kombëtare të Zonave të Mbrojtura Zamir Dedej thekson se janë disa projekte të ndërmarra nga ministria e Turizmit dhe Mjedisit siç është edhe ai “Smail Albania” për zhvillimin turistik.
Përveç kësaj, risi për këtë vit, ku dhe numri i vizitorëve pritet të jetë me i lartë se vitin e kaluar i cili arriti deri në 1.5 milion, është ngritja e 8 qendrave të tjera vizitorësh në zonat e mbrojtura , të cilat do të ofrojnë shërbim dhe informacion për secilën zonë.
Zonat e Mbrojtura kanë një potencial të jashtëzakonshëm për zhvillimin e turizmit të qëndrueshëm – një faktor kyç në përmirësimin e situatës social-ekonomike të komuniteteve vendore si dhe kontribuojnë për mbrojtjen e biodiversitetit. Në këtë kuadër Bashkimi Europian po jep ndihmën e tij përmes financimit të projekteve të ndryshme në rritjen e standardeve të shërbimit ky bashkëpunim po shtrihet edhe në zonat bregdetare të cilat nuk hyjnë në kategorinë e zonave të mbrojtura por që do të mirëmenaxhohen.
Shembull konkret është projekti më i ri ai i territoreve Blu i cili për herë të parë do të zbatohet ne vendin tone në zonën e Porto Palermos dhe ka një financim prej 200 mijë eurosh. Për këtë Dedej theksoi se një pjesë e rëndësishme është edhe procesi i konsultave me komunitetin që do të ndihmoje në zhvillimin e qëndrueshëm të zonës bregdetare.
Nertila Doko/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.