Turizmi, rriten hyrje-daljet – Ministria e Brendshme publikon shifrat, 25% më shumë se në vitin 2017
Në mbyllje të sezonit turistik të vitit 2018 , Ministria e Brendshme ka publikuar shifrat për hyrje daljet e shtetasve në total ku rezulton se këtë vit rreth 4 milion më shumë shtetas kanë hyrë e dale në territorin tonë, krahasuar me një vit më parë, me një shifër në total prej 13.7 milion shtetas. Po ashtu një rritje ka pasur dhe numri i atyre që kanë lëvizur për qëllime turistike me rreth 500 mijë më shumë si edhe numri i automjeteve i cili këtë sezon u rrit me rreth 775 mijë krahasuar me sezonin turistik të një viti më parë .
Ndërkohë Policia e Shtetit shtoi masat për sezonin turistik duke angazhuar mbi 1100 forca policore të Rendit, kundër Krimeve, Qarkullimit Rrugor, Kufirit dhe FNSH si dhe 163 mjete të ndryshme të vëna në shërbim në zonat turistike dhe në plazhe.
Si rezultat i masave të shtuara ky sezon turistik pati gati 100 aksidente më pak se në vitin 2017 dhe një ulje e ndjeshme e aksidenteve me pasoja për jetën. Ndërsa ndryshe nga sezonet e mëparshme gjatë verës së 2018-ës nuk pati asnjë lloj incidenti me mjetet ujore në vijën bregdetare të të gjithë territorit.
Nertila Doko/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.