Turqi, brenda 1 viti dyfishohen çmimet e banesave – Ndikon lufta në Ukrainë, rritja e kostove në ndërtim dhe zhvlerësimi i lirës
Turqia po përballet me një rritje të ndjeshme të çmimeve të pasurive të paluajtshme, që është nxitur nga lufta në Ukrainë, nga rritja e kostove të ndërtimit dhe nga investimet publike në kjëtë sektor, për shkak të zhvlerësimit të monedhës vendase. Sipas të dhënave më të fundit të Bankës Qendrore të Turqisë, çmimi mesatar i banesave në Turqi është rritur me 96.4% me bazë vjetore, gjatë muajit shkurt të këtij viti.
Qyteti me rritjen më të madhe në çmimeve është Stambolli, me 106.3%. Referuar shifrave, edhe në provincat më pak të zhvilluara, si Diyarbakir, çmimet e shtëpive janë rritur me rreth 100%, krahasuar me të njëjtën periudhë të një viti më parë. Sipas analistëve, rritja e kostove të ndërtimit është arsyeja kryesore e rritjes së çmimeve të banesave.
“Vitin e kaluar, çmimi i një ton hekuri ishte rreth 3600 lira (243 dollarë), ndërsa tani është 16,000 lira (1082 dollarë),” deklaroi Ismail Mert, shef ekzekutiv i kompanisë së ndërtimit, AKCAM. Turqia mbështetet kryesisht në importe për t’u furnizuar me lëndë të parë dhe energji, dhe për këtë arsye zhvlerësimi i lirës turke me më shumë se 50%, që nga viti i kaluar rezultoi në një rritje të kostove.
Kjo situatë është përkeqësuar edhe më tej me rritjen e çmimeve të energjisë, si pasojë e luftës në Ukrainë. Por, në anën tjetër, analistët paralajmërojnë se rritja e kostove në ndërtim do të reduktojë ndërtimin e banesave të reja dhe do të shkaktojë një çekuilibër mes midis ofertës dhe kërkesës në treg.
Për shkak të zhvlerësimit të lirës, të shumtë janë edhe ata njerëz që blejnë një shtëpi, si mjet investimi. Rritja e çmimeve të pasurive të paluajtshme ka ndikuar edhe në tregun e qirave, pasi qiraja vjetore në tre qytetet kryesore, Stamboll, Ankara dhe Izmir është rritur me më shumë se 100%.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.