Turqia ul përsëri normën e interesit – Valuta e vendit bie në nivel rekord të ulët. Inflacioni, vazhdon i lartë!
Banka Qendrore e Turqisë ka shkurtuar normën bazë të interesit me 100 pikë bazë këtë Javë, pavarësisht rritjes së inflacionit, duke drejtuar valutën e vendit drejt një rekordi të ri të ulët kundër dollarit. Që prej Shtatorit, banka qendrore e vendit ka shkurtuar normën e interesit me 500 pikë bazë, apo 5%. Lira turke ka humbur mbi 50% të vlerës kundër dollarit këtë vit. Vetëm për muajin Dhjetor, banka qendrore ka ndërhyrë në tregjet e këmbimit valutor 4 herë, duke shitur dollar, për t’i bërë ballë zhvlerësimit të lirës.
Pasi banka qendrore uli normën e interesit, shumë njerëz shkuan në zyrat e kursit të këmbimit për të këmbyer lirën në dollar. Një person fitoi 1,330 lira brenda ditës, nga këmbimi. Megjithatë, fitimet shtesë nuk mund të kompensojnë dot rritjen e çmimeve. Sipas të dhënave të publikuara nga Instituti turk i Statistikave më 3 Dhjetor, norma e inflacionit në vend u rrit në 21.3% që është më e larta në 3 vite. Presidenti turk Recep Tayip Erdogan, ka thënë se vendi do vazhdojë t’i japë prioritet rritjes ekonomike, të nxitur nga interesat e ulëta. Ai mendon se normat e larta të interesit janë arsyeja për inflacion.
Klevis Llaha / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.