Tusk paralajmëron për Poloninë: “Mund të dalë aksidentalisht nga Europa, si ç’beri Britania”
Presidenti i Këshillit Europian, Donald Tusk, paralajmëroi se konflikti mes Varshavës dhe Brukselit mund të bëjë që Polonia të dalë aksidentalisht nga Bashkimi Europian. Ai bëri krahasime mes vendimit të Britanisë për të dalë nga Europa dhe përplasjeve të fundit të partisë “Ligji dhe Drejtësia” të Polonisë me Komisionin Europian dhe i bëri thirrje zyrtarëve polakë që “t’i thërrasin mendjes”.
Tusk, që ka qenë kryeministër i Polonisë nga 2007-a në 2014-ën dhe një rival i liderit polak Jaroslav Kaczynski, tha se edhe nëse Kaczynski nuk ka qëllim të nxjerrë Poloninë ng BE, vendi mund të dalë nga llogaritjet e gabuara si Britania.
“Nuk ka rëndësi nëse Kaczynski po planifikon daljen nga Bashkimi Europian apo iniciativa që sjellin në këtë rezultat. Unë kam eksperiencë me ish kryeministrin britanik David Cameron, pasi kam punuar me të për të shmangur Brexit. Camron hodhi idenë e një referendumi dhe pastaj u përpoq të mbajë Britaninë brenda, por në përfundim, ishte ai nismëtari i daljes së Britanisë. Kam frikë se Europa ka më pak vullnet për të mbajtur Poloninë brenda krahasuar me Britaninë, kështu që situata është serioze”, deklaroi Donald Tusk, President i Këshillit Europian.
Që prej ardhjes në pushtet, partia Ligji dhe Drejtësia ka pasur konflikte me Brukselin për çështje si emigracionin dhe zyrtarë të lartë të partisë kanë sulmuar institucionet e BE. Përplasja më serioze me Brukselin ka qenë mbi reformat e ashpra gjyqësore që kanë detyruar thuajse 30% e anëtarëve të Gjykatës së Lartë që të dalin në pension para kohe.
Politikëbërësit polakë argumentojnë se ndryshimet janë të rëndësishme për të pastruar sistemin që nuk është reformuar që prej kolapsit të komunizmit. Megjithatë, kritikët thonë se kjo cenon pavarësinë e gjyqësorit dhe gjykata kryesore e Bashkimit Europian, urdhëroi Poloninë që të ndalojë reformat.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.