TVSH mbi bizneset e vogla – Gjysma e subjekteve në Tiranë, Preçi: Qeveria të përballojë kostot
Nga 1 Prilli do të nisë zyrtarisht aplikimi Tatimit mbi Vlerën e Shtuar tek bizneset e vogla në të gjithë vendin, që kanë xhiro vjetore mbi 2 milion lekë.
Sipas të dhënave nga Drejtoria e Përgjithshme e Tatimeve, aktualisht të përjashtuar nga skema janë rreth 73 mijë biznese në rang kombëtar, ndërsa rreth 10 mijë prej tyre e tejkalojnë pragun e vendosur dhe do të detyrohen të paguajnë.
Afro gjysma bizneseve që do të preken nga taksimi janë të përqendruara në Tiranë, konkretisht 4500.
Referuar të dhënave nga Drejtoria e Taksave dhe Tarifave Vendore, Tranë, në kryeqytet janë në total 35.529 biznese të vogla që deri më tani kanë qenë jashtë skemës së pagesës.
Me gjithë zhurmën që është krijuar, eksperti i ekonomisë Zef Preçi, e shikon vendosen e taksimit si mënyrë për minimizimin e informalitetit, ndërsa thekson se problem qëndron tek mungesa e mekanizmave të rimbursimit.
Një tjetër shqetësim i ekspertit të ekonomisë, janë edhe kostot e transaksioneve, sipas të cilit qeveria duhet të përballojë një pjesë të tyre që të mos i rëndojë bizneset e vogla, pasi ekziston rreziku që një pjesë e mirë të mbyllen.
Pak ditë më parë Drejtoria e Tatimeve ka bërë me dije se është konstatuar një shtim i numrit të bizneseve që kanë aplikuar për çregjistrim.
Elisabeta Dosku/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.