TVSH për biznesin e vogël, Civici në “Përtëfol”: Duhet analizuar nevoja për formalizimin e ekonomisë por edhe impakti social që shkakton
Fondi Monetar Ndërkombëtar në projeksionet e ekonomisë globale për vitin 2017, për vendin tonë flet për një rritje ekonomike në nivelin e 3.7% dhe jo 3.9% siç parashikohej më parë. Edhe për vitet e ardhshme, projeksionet nuk kalojnë 4%, duke mbetur larg objektivit të qeverisë për një rritje ekonomike në nivelin e 5% apo 5.5% brenda këtij mandati.
Eksperti i ekonomisë Ardian Civici, i ftuar në emisionin “PërTëFol” në Tv Scan me gazetaren Dafina Hysa, thotë se duhet parë më me realizëm shifra e FMN, për shkak se analizon në mënyrë më shkencore dhe të detajuar faktorët që çojnë në rritjen ekonomike.
“Ka një ndarje të madhe mes menaxhimit apo performancës më të mirë të qeverisë, e cila nuk ndikon më shumë se 10 apo 20% në rritjen e PBB-së, si dhe faktorëve strukturorë që ushqejnë rritjen ekonomike. Nëse analizohet trendi i tyre, kuptohet edhe frenimi i FMN-së për të qenë në linjë me qeverinë. Ndaj shifra për rritjen ekonomike, kërkon argumentim më të madh të faktorëve që e bëjnë të mundur” shprehet Civici .
Lidhur me vendimin e qeverisë për të hequr pragun e TVSH, pra duke përfshirë në skemë edhe biznesin e vogël, profesor Civici, thekson se çështja duhet analizuar në nevojën për formalizimin e ekonomisë deri në qelizën më të vogël ekonomike, por edhe në impaktin social që shkakton.
“Kjo shihet në dy elementë: A është e mundur që bizneset e vogla të përgatisin faturat? Do të shtojë kostot, sepse do të kontraktojnë ekspertë të fushës. Po ashtu një pjesë e madhe e tyre do të kërkojnë rimbursimin e TVSH-së, në një kohë kur dihet, që ne kemi vështirësi ne proces edhe me ato pak biznese të mëdha” shprehet ai.
Eksperti Civici thotë se kategoria më e prekur nga aplikimi i TVSH, do të jenë bizneset e vogla që ofrojnë shërbime. Megjithatë nuk ndan mendimin për rritje të madhe të çmimeve apo falimentime masive nga ky vendim.
I pyetur për idenë e hedhur nga ekspertë kontabël, mbi përshkallëzimin e TVSH-së, për produktet bazë, Civici mbështet sugjerimin e FMN-së, duke theksuar se nuk duhet të bëhen politika sociale mbi sistemin fiskal, po kategoritë në nevojë të mbështeten në forma të tjera.
Më poshtë mund të shihni intervistën e plotë:
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.