Udhëzimi i 2 ministrave/Policia dhe përmbaruesit privatë, “aksion” të koordinuar për bllokimin e automjeteve me sekuestro
Policia e Shtetit do të regjistrojë në sistemin e administrimit elektronik të gjobave dhe në sistemin TIMS me statusin “Alert” kërkesat për bllokimin fizik të dërguara nga përmbaruesit privatë për çdo automjet apo mjet motorik mbi të cilin është vendosur sekuestro konservative në Drejtorinë Rajonale të Shërbimit të Transportit Rrugor. Udhëzimi i përbashkët i ministrit të Brendshëm dhe i ministrit të Drejtësisë përcakton rastet dhe procedurat e bashkëpunimit mes Policisë së Shtetit dhe përmbaruesve gjyqësore privatë.
Një nga pikat më të rëndësishme të udhëzimit është ajo që synon garantimin e realizimin e procesit të sekuestrimit të mjeteve motorike nga përmbaruesi gjyqësor privat, nëpërmjet procedurave të bllokimit fizik të tyre nga Policia e Shtetit.
Referuar udhëzimit, përmbaruesi gjyqësor privat do të mbështetet dhe ndihmohet nga Policia e Shtetit për sekuestrimin e mjeteve motorike të sekuestruara prej tij, të cilat janë regjistruar më parë si të sekuestruara nga Drejtoria e Përgjithshme e Shërbimit të Transportit Rrugor.
Për çdo mjet motorik të bllokuar, udhëizmi përcakton se duhet të njoftohet menjëherë dhe jo më vonë se 24 orë në rrugën e komunikimit zyrtar (adresë elektronike zyrtare, telefon) përmbaruesi gjyqësor privat, i cili brenda 72 orësh duhet të marrë në dorëzim dokumentacionin dhe/ose mjetin e bllokuar dhe të paguajë shpenzimet e kryerjes së bllokimit fizik dhe mbajtjes së automjetit të bllokuar në ambiente të caktuara parkimi nga Policia e Shtetit.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.