Udhëzimi i rëndësishëm i Financave/Deri me 31 gusht 2019, ata që kanë më shumë se 2 NIPT-e duhet t’i mbyllin e të mbajnë vetëm atë kryesor!

Më synim uljen e evazionit fiskal, këtë vit është aplikuar një ligj i ri që parashikon ndalimin e zotërimit të më shumë se një NIPT-i.

Në këto kushte, individët që kanë më shumë se një numër unik të identifikimit të tatimpaguesit NIPT duhet që brenda datës 31 gusht të këtij viti të aplikojnë në Qendrën Kombëtare të Biznesit për të mbyllur NIPT-et e tjera dhe mbajtjen e një NIPT-i kryesor.

Udhëzimi i ri i Ministrisë së Financave, i publikuar në Fletoren Zyrtare parashikon se “nëse do të vazhdojnë të ushtrojnë aktivitet në adresat që do të mbyllen duhet të aplikojnë në QKB për hapjen e tyre si adresa dytësore të NIPT-it aktiv kryesor”.

Nëse pas përfundimit të këtij afati konstatohet që një individ me të njëjtin numër të identifikimit personal nuk ka zbatuar këtë pikë administrata tatimore do të aplikojë vlerësimin alternativ të tatimpaguesit konform ligjit për procedurat tatimore.

Referuar deklarimeve zyrtare të autoriteteve financiare të vendit, kjo nismë synon t’i japë fund evazionit të konstatuar dhe praktikës me hapjen e mbylljen e NIPT-eve për të shmangur pagesën e detyrimeve.

Në një deklaratë të mëparshme, ministri i Financave deklaronte se janë konstatuar raste kur një person kishte 7 NIPT-e e ndiqej praktika e mbylljes së një NIPT-i pa shlyer detyrimet e çeljen e një NIPT-i tjetër për të vijuar aktivitetin duke krijuar kështu një shmangie të detyrimeve tatimore.

Me ndryshimet e reja, çelja e një NIPT-it të ri në Qendrën Kombëtare të Biznesit mund të bëhet vetëm pasi të jetë çregjistruar NIPT-i ekzistues.

Po ashtu, një ndryshim tjetër që lidhet sërish me çështjen e NIPT-it është ajo e ndarjes së aktivitetit, ku një person fizik tregtar mund të ketë të regjistruar më shumë se një të tillë, e me numra të ndryshëm. Me ndryshimet e reja, për çdo veprimtari të re që kërkon të regjistrojë një person fizik tregtar, do të pajiset me numër identifikimi të njëjtë dhe ajo që do të ndryshojë do të jetë numri serial i aktivitetit të ri, me qëllim identifikimin e vendndodhjes të veprimtarisë së re.

SCAN

Lexo edhe: 

“Shtrëngohen” procedurat tatimore! Si do të eleminohen skemat me niptet sekondare, ndarjet apo mbylljet fiktive

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.