Udhëzimi i ri për kamerat e sigurisë, 11 detyrat që duhet të përmbushin bizneset dhe subjektet e tjera

Pas miratimit të ligjit të ri që detyron institucionet publike e bizneset private që të vendosin sisteme sigurie e kamerash në kuadër të ligjit të ri për sigurinë publike, Komisioneri për Mbrojtjen e të Dhënave Personale ka publikuar udhëzimin që i detyron subjektet që të ruajnë privatësinë e klientëve dhe qytetarëve. Udhëzimi që tashmë ka marrë fuqi ligjore përcakton 11 detyrime për subjektet që do të vendosin sistemin e kamerave të sigurisë, raporton SCAN.

Referuar udhëzimit, çdo subjekt publik dhe privat, i cili vendos masat shtesë të sigurisë, ka për detyrë:

1-Para instalimit dhe vënies në funksionim të sistemeve të video survejimit, apo përdorimit të masave të tjera shtesë, të kryejë analizë të ndikimit në mbrojtjen e të dhënave dhe jetën private dhe të dokumentojë atë.

2-Të vendosë në ambientet e survejuara tabelën informuese

3-Të autorizojë në formë të shkruar personin/at i cili ka të drejtë të administrojë mjetin e vendosur/instaluar si masë shtesë e sigurisë, si dhe nivelin e aksesit në të dhënat e përpunuara

4-Të kërkojë plotësimin dhe nënshkrimin e “Deklaratës së konfidencialitetit” nga çdo person i autorizuar

5-Të mbajë dhe administrojë të dokumentuar veprimet e kryera gjatë përpunimit të të dhënave personale me mjetet shtesë të sigurisë

6-Të monitorojë respektimin e normave të sigurisë për mbrojtjen e të dhënave të automatizuara kundër prishjes së tyre aksidentale ose të paautorizuar, si dhe kundër hyrjes, ndryshimit dhe shpërndarjes së paautorizuar të tyre

7-Të lejojë ushtrimin e së drejtës së çdo personi, subjekt i të dhënave personale për të konsultuar përpunimin e të dhënave përkatëse dhe të dokumentojë mbi këtë të drejtë;

8-Të hartojë rregulla të shkruara për vendosjen e masave shtesë të sigurisë, përpunimin e të dhënave personale, personat e lejuar për të aksesuar bazën e të dhënave, kohën e ruajtjes së të dhënave, si dhe mënyrën e shkatërrimit të tyre

9-Të sigurojë që këndi i vrojtimit të kamerave të sistemit të video survejimit të jetë i tillë që të filmojë pamje brenda qëllimit për të cilin është instaluar sistemi

10-Të sigurojë që çdo transmetim në rrjet i të dhënave të bëhet në formë të koduar me të drejtë aksesi të plotë vetëm nga dhënësit dhe marrësit e tyre

11-Të përcaktojë në rregulloren për mbrojtjen e të dhënave personale, nivelet e aksesit për kategoritë e atyre që aksesojnë, ndërveprimin e bazës së të dhënave etj.

Sipas ligjit të miratuar gjatë vitit të kaluar, bizneset dhe subjektet e tjera që kanë detyrimin që të vendosin sistemin e kamerave të sigurisë në kuadër të ligjit të ri për masat shtesë të sigurisë publike, kanë afat deri me 28 dhjetor 2017 që të përmbushin detyrimin.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.